Mamma, een uit ñ miljoen...
Ek skat die wêreld is net te besig vir my. Al die nuus, probleme, uitdagings en afsprake... Ek wil net vir so ñ klein rukkie vlug. Ek wil gaan wegkruip in my mamma-grot en my wonde lek. Ek wil rus en kragte ophou voor ek weer breë bors die wêreld aanpak.
Dis seker nou nie regtig só erg nie, maar daar steek tog ñ mate van waarheid hierin.
Elke mamma het ñ breek nodig. Elke mamma het bietjie eie-ek tyd nodig... op ñ gereelde basis.
Februarie word dikwels beskryf as die maand van liefde. Kom ons wees ook lief vir ons eie-ek hierdie maand. Kom ons leer ons eie liefdestaal ken.
Dink aan vyf maniere waarop jy kan ontspan. Vyf boeke wat jy al lankal wou lees. Vyf dinge waaroor jy graag sal wil lag. Dink aan vyf maniere om jouself te bederf.
Bou daardie mamma kragte weer op. Sit nuwe petrol in jou tenk. Mag elke mede-Mamma ñ wonderlike Februarie beleef. Mag dit die begin wees van baie goeie oomblikke.
Ek laat jul met die volgende stukkie inspirasie uit die oogpunt van ñ kind:
"Beste Mamma,
Jý is my superheld. Ek weet ek sê dit nie gereeld nie. Daar is niemand soos my Mamma nie. Die dag as ek siek is weet ek dat Mamma my sal versorg. Die aande se hulp met huiswerk, die beplanning vir entrepeneursdae en skoolbyeenkomste. Daardie lekker gesonde kos in my kosblik waaroor ek soms kla. Mamma, ek weet jy kan dalk nie altyd daar wees vir my deur die dag nie, maar Mamma se harde werk help so baie dat ek kan deelneem aan sport en vir my sakgeldjie aan die einde van die maand. Mamma spandeer ure in die kombuis sodat ek kan smul aan my gunsteling geregte. Mamma, mamma, mamma... ek dink Mamma is al so moeg om die woord mamma te hoor, heeltyd, altyd, maar Mamma is nogsteeds altyd bly om my te sien. Dit laat my so belangrik voel en maak my hart so bly. Mamma, ystervrou, jy beteken die wêreld vir my. Mamma is dalk net een van die baie miljoene mammas in die hele wye wêreld, maar Mamma jý is een uit ñ miljoen vir my!"
Mamma-groete,
~TG.
Geen opmerkings nie:
Plaas 'n opmerking